ОПИКЛАМ (OPICLAM)

Линкозамидын бүлгийн антибиотик

Нэг зөөлөн капсулд агуулагдах хэмжээ:…………..Клиндамицин гидрохлорид 150 мг № 50

Жирэмсэн эхчүүдэд хэрэглэх боломжтой. (Жирэмсний категор-FDA-B, Австрали-А)

Ангилал: Антибиотик, нян вирусын эсрэг бэлдмэл

Фармакологийн үйлдэл

Клиндамицин нь линкозамидын бүлгийн антибиотик бөгөөд грам эерэг ба агааргүйтэн нянд хүчтэй нөлөөлдөг. Мөн эгэл биетэн, микоплазмын эсрэг идэвхтэй үйлчилдэг. Нянгийн рибосомын 50S хэсэгтэй холбогдож нянгийн эд эсийн доторх нийлэгжилтийг саатуулж үржлийг зогсоодог. Клиндамицин хоол боловсруулах замаас хурдан шимэгддэг. Клиндамицин нь ихэнх агааргүйтэн, грам эерэг нянгийн эсрэг идэвхтэй нөлөөлдөг. Үүнд : Staphylococcus aureus, S.Epidermidis spp (пенициллиназа ялгаруулдаг штамуудыг оруулан), Streptococcus spp, Streptococcus pneumoniae, Baciillus anthracis, Corynebacterium diphtheria. Агааргүйтэн грам эерэг нянгууд тухайлбал: Eubacterium, Propionbacterium, Peptococcus, Peptostreptococcus, Clostridium perfringens, Clostridium tetani-ийн эсрэг өндөр идэвхтэй. Агааргүйтэн грам сөрөг нянгуудаас Fusubacterium spp, Veillonella, Bacteroides spp нь клиндамицинд мэдрэг бөгөөд өсөлт нь зогсдог. Клиндамицин нь Toxoplasma gondii, Plasmodium spp зэрэг эгэл биетэн протоза, Actinomyces spp, Nocardia asteroids зэрэг зарим штамын эсрэг өндөр идэвхтэй. Мөн Staphylococcus aureus-ын метициллинд тэсвэртэй штамм (MRSA), Enterobacteriacae грам сөрөг нян, Neisseria gonorrhoeae, Neisseria meningitis, Haemophylus influenza зэрэг нянгийн эсрэг идэвхтэй үйлчилдэг.

Клиндамицин нь АНУ болон Австралийн жирэмсэн болон хөхүүл эхчүүдэд үзүүлэх эрсдэлийн шалгуураар B болон А ангилалд ордог бөгөөд энэ ангилалд жирэмсэн болон хөхүүл эхэд хэрэглэх боломжтой гаж нөлөө багатай антибиотикт ордог.

Найрлага

Нэг зөөлөн капсулд агуулагдах хэмжээ:…………..Клиндамицин гидрохлорид 150 мг № 50

Давуу тал

Нярай болон дутуу төрсөн хүүхдэд хэрэглэх боломжтой.
Өндөр настай хүмүүст бөөр болон элэгний үйл ажиллагаа нь буурдаг боловч клиндамицин нь гаж нөлөө багатай тул тунг багасгах шаардлагагүй.
Жирэмсэн эмэгтэйд хэрэглэх боломжтой.
Метициллинд тэсвэртэй алтлаг стафилококкийн эсрэг идэвхтэй.
Пенициллины бүлгийн антибиотикт харшилтай хүмүүст хэрэглэх боломжтой.

Хэрэглэх заалт

Хүнд хэлбэрийн үрэвсэлт өвчин: Уушгины үрэвсэл, уушгины буглаа, плеврын эмпием, эндометрит, аднексит
Арьсны идээт халдвар: хатиг, Propionibacterium нянгаар үүсгэгдсэн батганы эмчилгээ
Боом өвчин
Нарийн гэдэс цоорсноос үүссэн хэвлийн гялтангийн үрэвсэл, буглаанаас сэргийлэх зорилгоор аминогликозидын бүлгийн антибиотиктой хавсран хэрэглэнэ.
Пенициллинд тэсвэртэй грам эерэг нянгаар үүсгэгдсэн өвчин
Шүд авахад халдвар цусанд орохоос сэргийлэх зорилгоор
Яс болон үений стафилококкийн халдвар : Ясны чөмөгний идээт үрэвсэл
MRSA-ийн халдвар (метициллинд тэсвэртэй алтлаг стафилококк)-ийн халдвар
Диабетын үеийн хөлийн тавхайн шархны эмчилгээ
Бэлгийн замаар дамжин халдварлах өвчнүүд.
Жирэмсэн эхчүүдэд хэрэглэх боломжтой тул нянгийн шалтгаантай үтрээний эмгэгийг эмчлэх зорилгоор тус тус хэрэглэнэ.

Хэрэглэх тун

Насанд хүрэгсэд 150-450 мг-аар 6 цагийн зайтай ууна. Шүд авахад халдвар цусанд орохоос сэргийлэх зорилгоор 300 мг-аар өдөрт 2 удаа ууна.
Хүүхдэд 3-6 мг/кг тооцон 6 цагийн зайтай ууна.
Боом өвчний үед доксициклин эсвэл ципрофлоксацинтай хавсран хэрэглэнэ.

Хориглох заалт

Нарийн гэдэсний шархлаат үрэвсэл, Кроны өвчин, энтероколиттой өвчтөнд хэрэглэхгүй.

Анхааруулга

Эритромицинтэй хамт хэрэглэхэд цусны сийвэнгийн уурагтай холбогдож клиндамицины идэвх буурдаг.
Миелорелаксант болон мэдээгүйжүүлэлтийн эмтэй хамт хэрэглэхэд тэдгээрийн нөлөөг нэмэгдүүлэн амьсгал зогсоох эрсдэлтэй.
Каолин болон аттапульгите агуулсан эмтэй хамт хэрэглэхэд клиндамицины идэвх буурдаг тул 4 цагийн зайтай ууна.
Бензилпенициллин, аминогликозид, рифампицин, цефалоспорин, фторхинолоны бүлгийн антибиотиктой хамт хэрэглэхэд үйлчилгээний эрчимжил-(синергизм) үүсч нянгийн эсрэг өндөр идэвх үзүүлдэг.